Forcat ruse kanë avancuar në disa qytete të Ukrainës, por Kievi vijon të rezistojë. Ushtria ruse tha se kishte kontrollin e Khersonit dhe zyrtarët lokalë ukrainas konfirmuan se forcat ruse kanë marrë selinë e qeverisë lokale në qytetin port të Detit të Zi me 300,000 banorë. Luftimet e ashpra po vazhdojnë në të gjithë vendin me forcat ruse që bëjnë presion në fronte të shumta, pasi taktikat kaluan në përshkallëzimin e bombardimeve të qyteteve të mëdha, duke i kthyer ato në rrënoja. “Daily Mail” ka bërë një analizë të situatës në qytetet ku po luftohet.
Pas nisjes së pushtimit javën e kaluar, Rusia i bëri të qarta planet e saj për të pushtuar shpejt kryeqytetin. Zyrtarët perëndimorë të sigurisë kishin frikë se rusët do të rrëzonin qeverinë dhe do të zbatonin regjimin e tyre të ri brenda disa ditësh. Por trupat e Putinit kanë hasur në rezistencë të jashtëzakonshme dhe nuk kanë arritur të kapin qytetin ku qëndron Zelensky.
Deri më tani, Kievi i ka shpëtuar asaj që vëzhguesit kishin frikë se do të ishin përpjekjet ruse për ta rrethuar dhe bombarduar atë për t’u nënshtruar, pasi përleshjet në periferi çuan në zmbrapsjen e ushtarëve të Moskës. Por bombardimet e vazhdueshme ajrore janë tani një tipar i jetës në qytet ku sirenat e sulmit ajror bien çdo 15 minuta dhe shkollat dhe shtëpitë janë në shënjestër. Zelensky tha se forcat tokësore ruse kanë ngecur dhe Moska tani po kryen sulme ajrore, por se ato po përballen nga sistemet e mbrojtjes ukrainase.
Katër sulme të mëdha raketash goditën kryeqytetin gjatë natës, duke përfshirë një që goditi një stacion treni që përdorej për evakuimin e civilëve, ndërsa të tjerët goditën stacionet televizive dhe radiofonike. Kryebashkiaku i Kievit, Vitali Klitschko tha se shpërthimet e dëgjuara gjatë natës ishin raketa ruse që u rrëzuan nga sistemet e mbrojtjes ajrore. Ukraina pretendoi se kishte rrëzuar një avion luftarak rus mbi Irpin, një qytet pranë Kievit i cili është sulmuar rëndë, në orët e para të së enjtes. Por Rusia ka filluar të ndryshojë fokusin e saj në qytete të tjera në një ndryshim taktikash, pasi nuk arriti të kapte shpejt qytetin kyç.
Kolona e madhe ruse me qindra tanke dhe automjete të tjera duket se ka ngecur pranë Kievit dhe nuk ka bërë asnjë përparim të vërtetë në ditët e fundit. Autokolona, e cila në fillim të javës dukej e gatshme për të nisur një sulm në kryeqytet, është vonuar nga mungesa e karburantit dhe ushqimit, tha zyrtari.