“Ta gëzosh ditëlindjen zemra jonë Mona, qofsh përherë e qeshur dhe e lumtur përkrah liderit tonë të qetë e të dashur, jetë të gjatë së bashku me fëmijët e mrekullueshëm”.
Ky urim i grave të LSI-së në 9 prill të vitin 2016, për ditëlindjen e Monika Kryemadhit, është një tjetër provë e pasurive të fshehura, pastrimit të parave dhe korrupsionit të Monikës dhe Ilir Metës.
Disa nga gratë e rrethit të Monikës dhe Metës, para se Edi Rama t’u merrte ‘tepsinë e pushtetit’ në 2017, kanë treguar se si Monika Kryemadhi gjeti në internet një gjerdan floriri që kushtonte 47 mijë euro. Foton e gjerdanit ia dërgoi njërës prej zonjave të LSI-së.
Mesazhi ishte i qartë dhe gratë u hodhën menjëherë në veprim. Ato mblodhën paratë dhe blenë gjerdanin.
Ishte koha kur Ilir Meta dhe Monika Kryemadhi, duke menduar se në Shqipëri nuk do të ketë kurrë drejtësi, ekspozonin herë pas here luksin e tyre me para të pista, kryesisht me burim korrupsioni dhe trafiqesh. I tillë është edhe reportazhi i Monikës me Sonila Meçon për vilën në Gjirin e Lalzit apo festat pompoze të Ilir Metës atje. Monika Kryemadhi tregoi në një foto edhe gjerdanin e shtrenjtë që i kishin blerë gratë e LSI.
Por, pas miratimit të ndryshimeve kushtetuese në 22 korrik 2016, ku u parashikua edhe ngritja e SPAK, Monika Kryemadhi dhe Ilir Meta zhdukën çdo pamje filmike dhe foto që tregonte pasuritë e tyre të paligjshme. U zhduk reportazhi i Sonila Meços për vilën me 11 banjo. U zhdukën pamjet e festave të Metës. Mes tyre, u zhduk edhe fotoja e gjerdanit si provë krimi. Monika Kryemadhi nuk e shënoi kurrë këtë dhuratë në deklaratat e pasurisë që ka dorëzuar në ILDKP, duke konsumuar edhe një herë veprën penale të fshehjes dhe mashtrimit me pasurinë.