Kryeministri Edi Rama edhe presidentja e Kosovës Vjosa Osmani nuk i kanë fshehur dot marrëdhëniet e tensionuara mes tyre teksa ndodhen në Samitin e SEECP në Selanik të Greqisë ku po marrin pjesë liderë të rajonit, përfshirë edhe kancelarin gjerman Olaf Scholz dhe drejtues të BE.
Një foto e Osmanit po bën xhiron e rrjetit që pasi publikoi një album me tre foto në profilin e saj në Facebook, pak orë pas kryeministrit Rama.
Teksa ishin të ftuar në një darkë pune ku i pranishëm ishte edhe kancelari gjerman, Olaf Scholz, Osmani e Rama ishin ulur afër me njëri-tjetrin, por bie në sy se në fotografitë e publikuara nga dy liderët, shihet se ata nuk kanë komunikuar dhe mbajnë qëndrime të ‘ftohta’.
Më herët, edhe Rama publikoi një album me foto nga takimi, ku shfaqet duke bashkëbiseduar me pjesëmarrësit, përfshirë edhe presidentin e Serbisë, Vuçiç, ndersa presidentja Osmani shihet vetëm në një fotografi të përgjithshme te tryezës ku shihen të gjithë pjesëmarrësit.
Përplasjet mes Osmanit dhe Ramës e kanë zanafillën që nga koha kur flitej për idenë e korrigjimi të kufijve mes Kosovës dhe Serbisë, me Ramën që përflitej si përkrahës dhe Osmani një kundërshtare e fuqishme. Ndërkohë përçarja mes dy politikanëve është thelluar me daljen në dritë të idesë për “Ballkanin e Hapur”, ide këtë të cilën presidentja e Kosovës e ka kundërshtuar vazhdimisht.